26 ta’ Ġunju: San Josemarìa Escrivà de Belaguer

Verżjoni Vidjo: San Josemarìa Escrivà de Belaguer

“Ir-rużarju mqaddes huwa arma qawwija. Użah b’kunfidenza u tibqa’ b’ħalqek miftuħ bir-riżultati tiegħu.” – San Josemarìa Escrivà de Belaguer.

SAN JOSEMARÌA ESCRIVÀ DE BELAGUER
Saċerdot
1902 – 1975

Tagħrif: Dan il-qaddis twieled fi Barbastro, Spanja, fid-9 ta’ Jannar, 1902. Kien ordnat saċerdot ta’ 23 sena fit-28 ta’ Marzu, 1925.

Meta kien Madrid, fit-2 ta’ Ottubru, 1928, waqqaf l-Opus Dei, mod ġdid kif l-insara jistgħu jitqaddsu fid-dinja bix-xogħol ordinarju tagħhom u t-twettiq tad-dmirijiet personali, familjari u soċjali tagħhom. Hekk huma jsiru l-ħmira ta’ ħajja nisranija qawwija fl-ambjenti kollha.

Fl-1930, estenda l-opra tal-Opus Dei anke man-nisa. Fi Frar 1943, waqqaf is-Soċjetà Saċerdotali tas-Salib Imqaddes, magħquda inseparabbilment mal-Opus Dei. L-Opus Dei rċeviet l-approvazzjoni tas-Santa Sede f’Ġunju, 1950.

San Josemarìa mexxa u ħabrek biex l-Opus Dei tinxtered mad-dinja kollha b’talb kontinwu, penitenza u bil-prattika tal-virtujiet kollha. L-għerq u ċ-ċentru tal-ħajja interjuri tiegħu kien is-sagrifiċċju tal-quddiesa. Kien konxju ħafna li hu iben Alla espressa fil-preżenza kontinwa tat-Trinità Qaddisa, li qanqlitu biex ifittex li jidentifika ruħu ma’ Kristu f’kollox, li jgħix devozzjoni qawwija lejn il-Verġni Marija u San Ġużepp, u li jgawdi ħbiberija kontinwa u kollha fiduċja mal-anġli kustodji.

Mons. Escrivà offra aktar minn darba ħajtu għall-Knisja u għall-Papa.

Miet ta’ 73 sena nhar is-26 ta’ Ġunju, 1975 f’Ruma, fl-istess kamra fejn kien jaħdem, b’dik l-istess sempliċità qaddisa li kienet il-karatteristika tiegħu tul ħajtu kollha. Il-fdal tiegħu jinsab fil-knisja Prelazjali ta’ Santa Marija tal-Paċi, f’Ruma, fejn ħafna jmorru jitolbu fuq il-qabar tiegħu.

Il-Qaddis Papa Ġwanni Pawlu II iddikjarah Beatu f’Mejju, 1992 u mbagħad ddikjarah ukoll qaddis f’Ottubru, 2002.

L-Opus Dei, li fl-1982 saret prelatura personali, hi mxerrda fil-ħames kontinenti u llum tgħodd ’il fuq minn 60,000 membru fi 80 nazzjon. L-aktar ktieb magħruf tiegħu ‘It-Triq,’ jinsab maqlub ukoll bil-Malti.

Ħsieb: Il-Qaddis Papa Ġwanni Pawlu II hu magħruf sew għal kemm mexxa ’l quddiem l-għarfien mill-Knisja ta’ eluf ta’ qaddisin u beati ġodda. Xi wħud minnhom kellhom il-kawża għall-kanonizzazjoni ilha tistenna s-snin sħaħ. Oħrajn fittex li jħaffef il-proċess tagħhom minkejja li għexu fi żmienna bħall-Beata Tereża ta’ Kalkutta u Josemaria Escriva. Se naraw għaliex …

It-talba tal-Kolletta mil-Liturġija tal-lum, tikkonferma l-verita’ pproklamata mill-Konċilju Vatikan II u, b’referenza għal San Josemarìa Escrivà de Belaguer, iżżid: “Agħtina li bl-interċessjoni u l-eżempju tiegħu nistgħu, permezz tal-ħidma tagħna ta’ kuljum, niġu ffurmati fuq ix-xbieha ta’ Ġesu’ Ibnek.” Din il-petizzjoni tiġbor fiha t-triq tagħna fuq din l-art: biex insiru aktar bħal Ġesù f’din id-dinja, permezz ta’ attività hekk familjari magħna bħax-xogħol.

Id-dawl tal-fidi jkabbar l-orizzonti tax-xogħol tagħna: jagħmilna naraw li l-bniedem kien maħluq minn Alla, u tqiegħed “fil-ġnien tal-Eden biex jikkoltivah u jżommu” (Ġenesi 2:15). Id-dinja ġiet fdata lill-umanità bħala ġnien li għandu jiġi kkultivat u mrawwem kuljum, spazju b’possibbiltajiet enormi, li għandna niskopru u niżviluppaw għall-glorja ta’ Alla u għas-servizz tal-aħwa.

L-Ispirtu s-Santu huwa l-protagonist kbir f’din it-triq tal-qdusija fil-ħajja ta’ kuljum. Kif San Pawl jgħid lir-Rumani: “Irċevejtu l-Ispirtu li jagħmel minnkom ulied adottivi; u li bih aħna nistgħu ngħajjtu: ‘Abbà! Missier!’ (Rumani 8:15). Hija karba, talba, li l-Ispirtu s-Santu jpoġġi fuq ix-xofftejn tagħna, u li nistgħu nirrepetu matul il-ġurnata, per eżempju meta aħna nesperjenzaw għejja fl-attivitajiet professjonali tagħna, u għandna nkomplu naħdmu. Il-fatt li nafu li aħna wlied Alla, għandu jimliena bil-kuraġġ biex nitolbu u nservu lil kulħadd, u ma nibqgħux indifferenti quddiem dawk li jsofru minn diversi sitwazzjonijiet bħalma huma l-qgħad jew xogħol insikur.

Id-dawl tal-Ispirtu s-Santu jwassalna għand Ġesù, li jiġi biex jiltaqa’ magħna, bħalma fittex lill-ewwel dixxipli ma’ xatt ix-xmara ta’ Ġenesaret. Huwa jidħol fil-ħajja tagħna bl-istess mod kif daħal fid-dgħajsa ta’ Pietru u l-ħbieb tiegħu. U l-istess dgħajsa li rat falliment professjonali – lejl sħiħ ta’ taħbit bla ma nqabad ħut – issir is-siġġu tat-tagħlim tal-Imgħallem, il-post minn fejn juri l-misteri tar-Renju ta’ Alla. U f’dik l-istess dgħajsa tibda avventura sopranaturali, prefigurata bil-qabda mirakuluża tal-ħut. Il-preżenza ta’ Kristu tittrasforma x-xogħol tagħna, id-dgħajsa antika tagħna, fil-post fejn jaġixxi Alla. U dan jista’ jsir b’ġesti li huma sempliċi imma mimlija bil-karità: għajnuna lil kollega li nsibuha diffiċli li ngħinu, iżda li jeħtieġ pariri prattiċi biex itemm il-ħidma tiegħu, jew forsi niddedikaw ftit minuti lil xi ħadd, jekk nafu li għandhom bżonn jitkellmu għax minn wiċċhom jidhru nkwetati.

Il-Mulej jitlobna nkunu strumenti f’idejh, biex nġibu l-ferħ u l-paċi f’din id-dinja li tant hi nieqsa minnhom. Huwa jindirizzalna l-istess stedina li għamel lil Pietru: “Aqdef ‘il barra fil-fond, u kalaw ix-xbiek tagħkom għas-sajd.” (Luqa 5:4). Ix-xbieki, din id-darba, jintefgħu f’dak ix-xogħol mimli bil-grazzja divina, sabiex jinħoloq lok għax-xhieda Nisranija, ta’ għajnuna sinċiera lill-kollegi tagħna u lin-nies kollha taħt il-kura tagħna. Nistgħu niftakru hawn fl-istedina tal-Papa Franġisku: “Meta l-isforzi tiegħek biex terġa’ tħeġġeġ il-fidi fil-ħbieb tiegħek jidhru li huma għal xejn, bħall-isforzi tas-sajjieda tul il-lejl, ftakar li Ġesù kollox jibdel. Il-Kelma tal-Mulej mliet ix-xbieki u l-Kelma tal-Mulej tagħmel il-ħidma missjunarja tad-dixxipli tiegħu effettiva” (22 ta’ Settembru, 2013).

L-Ispirtu s-Santu, li jgħix magħna, iħeġġiġna, jekk nippermettulu, biex nitfgħu fil-fond ix-xbieki tagħna, jiġifieri li nidħlu f’dawk l-orizzonti appostoliċi li aħna niskopru kuljum: fil-familja tagħna, fl-ambjent professjonali tagħna, fir-relazzjonijiet mal-ħbieb u konoxxenti. Il-mirakli se jiġu ripetuti, kif San Josemaría qal: “Meta Ġesù mar f’xatt il-baħar mad-dixxipli tiegħu ma kienx qed jaħseb biss dwar il-qbid tal-ħut. U għalhekk meta Pietru jaqa’ fuq irkupptejh u umilment jammetti: ‘Tbiegħed minni, Mulej, għax jiena raġel midneb,’ il-Mulej wieġbu: ‘Tibżax; minn issa ‘l quddiem tkun taqbad in-nies'(Luqa 5:10). F’din il-ħidma ġdida tas-sajd, il-poter u l-effettività ta’ Alla se jkunu wkoll disponibli: l-appostli huma strumenti għall-ħidma ta’ stagħġib kbir, minkejja n-nuqqasijiet personali tagħhom” (Ħbieb ta’ Alla, nru 261). Aħna wkoll għandna nkunu appostli, appostli f’nofs ix-xogħol tagħna u r-realtajiet umani kollha li fihom aħna msejħa biex inġibu lil Alla.

Il-Madonna hija r-Reġina tal-Appostli, kif ngħidulha fil-litanija tar-Rużarju. Ejjew nitolbu lil Marija biex tgħallimna nassistu b’mod attiv il-missjoni tal-Knisja għas-salvazzjoni tad-dinja. Din hija x-xewqa li ġarr f’qalbu San Josemarìa Escrivà de Belaguer: li nqiegħdu lil Kristu fiċ-ċentru u fl-għerq ta’ kull attività umana, f’unjoni mal-Knisja kollha: omnes cum Petro ad Iesum per Mariam!

Talba: O Mulej, Int dawwalt lil San Josemarìa Escrivà de Belaguer u wrejtu kif isir aktar bħal Ibnek Ġesù f’din id-dinja, permezz tal-attivitajiet ordinarji ta’ kuljum u hu għallem dan fil-Knisja, agħtina li bl-interċessjoni u l-eżempju tiegħu nistgħu, permezz tal-ħidma tagħna ta’ kuljum, niġu ffurmati fuq ix-xbieha ta’ Ġesù Ibnek. Bl-istess Ibnek Ġesù  Sidna. Ammen.

English Version: https://www.catholicnewsagency.com/saint/st-josemaria-escriva-de-balaguer-734

Vatican Biography: https://www.vatican.va/news_services/liturgy/saints/ns_lit_doc_20021006_escriva_en.html

Wikipedia: https://en.wikipedia.org/wiki/Josemar%C3%ADa_Escriv%C3%A1

Nota: It-Tagħrif dwar dan il-qaddis tal-lum huwa meħud mill-fuljett Signum Fidei.

31 ta’ Marzu: San Benjamin

Verżjoni Vidjo: San Benjamin

“Kull min jistqarr quddiem il-bnedmin li hu miegħi, jien ukoll nistqarr li jiena miegħu quddiem Missieri li hu fis-smewwiet. Iżda min jiċħad lili quddiem il-bnedmin, jien ukoll niċħad lilu quddiem Missieri li hu fis-smewwiet”. – Ġesù f’Mattew 10: 32-33

SAN BENJAMIN
Djaknu u Martri
† c. 424

Tagħrif: Fil-bidu tas-seklu ħamsa, l-insara tal-Persja kienu gawdew tnax-il sena ta’ paċi. Fis-sena 420, matul ir-renju ta’ Isdegard, iben is-Sultan Sapor III, dan is-sliem kien disturbat miż-żelu xejn għaqli ta’ Abdas, isqof nisrani, li ħaraq it-tempju tal-alla Nar, is-santwarju kbir tal-Persjani. Ir-re Isdegard hedded li jeqred il-knejjes kollha tal-insara kemm-il darba l-isqof ma jibnix mill-ġdid dak it-tempju.

Billi Abdas irrifjuta li jagħmel dan, allura t-theddida ġiet esegwita; il-knejjes ġew meqruda, lil Abdas qatluh, u bdiet persekuzzjoni ġenerali li damet sejra 40 sena. Isdegard miet fl-421, imma ibnu u suċċessur tiegħu, Varanes, komplew il-persekuzzjoni b’qilla akbar. L-insara kienu sottomessi għall-moħqrijiet mill-aktar kiefra.

Fost dawk li sofrew kien hemm Benjamin, djaknu, li kien mitfugħ il-ħabs. Fl-aħħar, ambaxxatur tal-imperatur ta’ Kostantinopli qalagħlu l-ħelsien bil-kundizzjoni li hu qatt ma jkellem iktar lil ħadd min-nies tas-sultan dwar ir-reliġjon.

Iżda San Benjamin kien iħoss li kien dmir tiegħu li jipprietka lil Kristu, u li ma setax iżomm is-skiet. Għalkemm ġie meħlus fuq il-ftehim li sar bejn l-ambaxxatur u l-awtoritajiet Persjani, hu ma riedx joqgħod ma jitkellimx, u ma kien jitlef ebda opportunità li jxandar lil Kristu. Wara li ġagħluh isofri ħafna, San Benjamin tawh il-martirju għall-ħabta tas-sena 424.

Ħsieb: San Benjamin ħa bis-serjetà l-kliem ta’ Sidna Ġesù meta qal: “Kull min jistqarr quddiem il-bnedmin li hu miegħi, jien ukoll nistqarr li jiena miegħu quddiem Missieri li hu fis-smewwiet. Iżda min jiċħad lili quddiem il-bnedmin, jien ukoll niċħad lilu quddiem Missieri li hu fis-smewwiet.” (Mattew 10:32-33). Benjamin ma ċaħadx lill-Mulej u hekk huwa sofra l-konsegwenzi terribbli li ġabu magħhom l-mexxejja ħżiena. Sakemm ma nkunux lesti li nitilfu ħajjitna għal Kristu, aħna mhux se nirtu s-Saltna Tiegħu, u lanqas għandna nirtuha. Illum, agħti l-qalb tiegħek lil Ġesù u għix ħajtek għaliH biss, ħalli Hu jkun jista’ jippreparalek post għalik fis-Saltna Eterna Tiegħu.

Dan li ġej huwa kliem Chiara Lubich:

“Ġesù jħeġġiġna biex ngħixu bis-sħiħ il-fidi tagħna fih, għax il-ħajja eterna tagħna tiddependi minn kif inkunu ġibna ruħna miegħu f’ħajjitna hawn fl-art. Hu jgħidilna li jekk aħna nuru li nafuh quddiem il-bnedmin, hu jkun jista’ juri li jafna quddiem Missieru. Iżda, jekk inkunu ċħadnieh quddiem il-bnedmin, hu wkoll jiċħadna quddiem il-Missier. Għax iħobbna, Ġesù qed ifakkarna fil-premju jew fil-kastig li se nieħdu wara din il-ħajja. Kif jgħid wieħed minn Missirijiet il-Knisja, Ġesù jaf li xi drabi aħna aktar nitqanqlu mill-biża’ tal-kastig milli mill-wegħda ta’ premju sabiħ. Għalhekk hu qed ikabbar fina t-tama fil-hena bla tmiem u fl-istess ħin, biex isalvana, iqanqal fina l-biża’ tal-kundanna.

F’moħħu, Ġesù għandu ħaġa waħda biss: li aħna naslu għall-ħajja ta’ dejjem m’Alla. Fl-aħħar mill-aħħar, dan biss jgħodd; dan hu l-għan li għalih ġejna maħluqin. Bih biss, fil-fatt, nistgħu nilħqu l-milja tagħna u niksbu b’mod sħiħ it-tamiet kollha tagħna. Għalhekk Ġesù jħeġġiġna “nistqarruh” sa minn issa stess. Imma jekk f’din il-ħajja ma rridux li jkollna x’naqsmu miegħu, jekk niċħduh issa, meta naslu biex ngħaddu għall-ħajja l-oħra, għad insibu ruħna maqtugħin minnu għal dejjem.

Meta naslu fi tmiem il-ħajja tagħna hawn fl-art, Ġesù mhu se jagħmel xejn għajr li jikkonferma quddiem il-Missier l-għażla li kull wieħed ikun għamel f’ħajtu, bil-konsegwenza li din l-għażla ġġib magħha. Meta semma l-ġudizzju tal-aħħar, hu ried jurina kemm hi importanti u serja d-deċiżjoni li nieħdu f’din il-ħajja: infatti fuqha tiddependi l-eternità tagħna.

Xi profitt se nagħmlu minn din it-twissija ta’ Ġesù? Kif se ngħixu din il-Kelma tiegħu? Qed jgħidilna hu stess: “Kull min jistqarr. . . li hu miegħi . . .  ”. Ejjew mela niddeċiedu li nistqarruh quddiem il-bnedmin bis-sempliċità u mingħajr ħabi. Ejjew nirbħu r-rispett uman. M’għandniex inkunu medjokri u nies li jaslu għal kompromess. Dan kollu jġib fix-xejn il-ħajja tagħna ta’ veri nsara.

Irridu niftakru li aħna msejħin biex inkunu xhieda ta’ Kristu. Hu jixtieq jasal għand il-bnedmin kollha bil-messaġġ tiegħu ta’ paċi, ġustizzja u mħabba sewwa sew permezz tagħna. Ejjew nagħtu xhieda tiegħu kulfejn inkunu, fil-familja, fuq ix-xogħol, fl-istudju u f’kull ċirkustanza oħra tal-ħajja. Għandna nagħtu din ix-xhieda fuq kollox b’imġibitna: b’ħajja onesta, bi drawwiet safja, bla ma nkunu marbutin mal-flus, billi nieħdu sehem fil-ferħ u fit-tbatija tal-oħrajn. Ix-xhieda tagħna għandna nagħtuha b’mod partikulari billi nħobbu ’l xulxin, inkunu ħaġa waħda. B’hekk il-paċi u l-ferħ sħiħ, li Ġesù wiegħed li jagħti lil kull min hu magħqud miegħu, jimlewlna qalbna minn din id-dinja stess u mbagħad aħna nwassluhom lill-oħrajn.

Lil dawk li jistaqsuna għaliex inġibu ruħna hekk, għaliex aħna tant fil-paċi għalkemm qed ngħixu f’dinja mqallba, għandna nwieġbu bl-umiltà u bis-sinċerità bi kliem li jnebbaħna l-Ispirtu s-Santu. B’hekk inkunu qed nagħtu xhieda ta’ Kristu anki bil-kliem u bl-idejat tagħna. Imbagħad għandu mnejn li ħafna minn dawk li qed ifittxuh, ikunu jistgħu jsibuh. Xi drabi jista’ jkun li jifhmuna ħażin, jew li ma jaqblux magħna, jew iwaqqgħuna għaċ-ċajt u forsi anki jeħduha kontrina u jippersegwitawna. Ġesù ppreparana anki għal dan: “Bħalma ppersegwitaw lili hekk ukoll jippersegwitaw lilkom.” (Ġwanni 15:20).

Għadna fit-triq it-tajba. Ejjew inkomplu nagħtu xhieda tiegħu b’kuraġġ anki meta jiġu fuqna l-provi, anki jekk ikollna nagħtu ħajjitna. Dak li qed jistenniena jistħoqqlu dan kollu – hemm il-Ġenna li qed tistenniena, fejn Ġesù, dak li aħna nħobbu, jistqarr li hu magħna quddiem il-Missier għall-eternità kollha.”

Talba: Għażiż Ġesù, agħmel li aħna qatt ma nibżgħu nistqarruk quddiem il-bnedmin, billi nsemmgħu leħenna b’ l-imħabba għaliK u nuru li aħna tiegħeK u miegħeK. Nitolbuk li, bħal San Benjamin, aħna nkunu dejjem lesti li nagħtu xhieda tal-fidi tagħna, anke meta affaċċjati minn persekuzzjonijiet u diffikultajiet ta’ kull xorta. Bi Kristu Sidna. Ammen.

English Version: http://saintscatholic.blogspot.com/2016/03/st-benjamin-deacon-martyr.html

Alternative Reading: https://catholicsaints.info/saint-benjamin-the-deacon/

Wikipedia: https://en.wikipedia.org/wiki/Benjamin_the_Deacon_and_Martyr

Nota: It-Tagħrif dwar dan il-qaddis tal-lum huwa meħud mill-fuljett Signum Fidei.

31 ta’ Diċembru: San Silvestru I

Verżjoni Vidjo: San Silvestru I

“Mhux intom tkunu li titkellmu, imma l-ispirtu ta’ Missierkom li jitkellem fikom.” – Antifona mil-Liturġija tas-Sigħat tal-Festa ta’ San Silvestru I

SAN SILVESTRU I
Papa
? – 335

Tagħrif: San Silvestru kien iben ta’ wieħed Ruman jismu Rufinu. Il-Papa San Marċellinu ordnah qassis f’dak iż-żmien ta’ paċi qabel bdiet il-persekuzzjoni ta’ Djoklezjanu. Imbagħad fil-persekuzzjoni, il-Qaddis wera qlubija l-iktar kbira.

Fi żmienu saru l-abdikazzjonijiet tal-Awgusti Djoklezjanu u Massimjanu. Ra jseħħ ukoll it-trijonf ta’ Kostantinu l-Kbir fis-sena 312.

Wara l-mewt tal-Papa San Milzjade, San Silvestru nħatar bħala s-suċċessur tiegħu, it-33 Papa, fis-sena 314.

San Silvestru mexxa l-Knisja b’għaqal u b’responsabbiltà kbira, meta l-Knisja bis-saħħa ta’ Kostantinu l-Kbir, ħarġet mill-katakombi.

Permezz tad-Delegati tiegħu, San Silvestru I ħa sehem fil-Konċilju ta’ Arles fis-sena 314, li kkundanna l-ereżija tad-Donatisti u wettaq il-validità tas-sagramenti amministrati mill-eretiċi; approva l-Konċilju Ekumeniku, dak ta’ Niċea fis-sena 325, li kkundanna l-ereżija ta’ Arju li Ġesù mhux Alla u għalhekk il-Madonna mhix Omm Alla, u fformula l-Kredu ta’ Niċea.

Fi żmien il-papat tiegħu nbnew il-knejjes kbar ta’ San Pietru, ta’ Santa Croce, ta’ San Lawrenz Fuori le Mura, ta’ San Silvestru, u oħrajn. Fi żmienu wkoll il-Palazz tal-Lateran sar ir-residenza uffiċjali tal-Papa.

San Silvestru miet fil-31 ta’ Diċembru tas-sena 335, wara li kien ilu Papa 21 sena u ħdax-il xahar. Difnuh fiċ-ċimiterju ta’ Prixxilla, fit-Triq Salarja.

Ħsieb: Tassew li fi żmien dan il-qaddis tal-lum, jew aħjar permezz ta’ Kostantinu l-Kbir, il-Knisja ħarġet mill-katakombi, inbnew knejjes kbar u sbieħ u r-Reliġjon Nisranija setgħet tiffjorixxi bla biża’ u hekk ġara. Imma, nistaqsi, x’sar minnhom dawk l-Insara ta’ fidi kbira li kienu lesti jxerdu demmhom biex jagħtu xhieda għat-twemmin tagħhom? Forsi n-Nisrani f’diversi postijiet sar Nisrani komdu u llaxka fil-valuri? U x’garanzija għandna li se nibqgħu daqshekk komdi jew li r-Reliġjon tagħna se tibqa’ sħiħa filwaqt li m’għadx hawn nies ta’ fidi biex jiddefenduha mill-għawġ li qed iħottha?

Xtaqt ninkludi hawn riflessjoni tal-Isqof ta’ Għawdex, Mario Grech (23 ta’ April, 2009) :

“X’futur għandha l-Knisja fl-Ewropa u f’pajjiżna? X’garanzija għandna aħna illi ma tiġix mewġa u tħott il-Knisja mwaqqfa minn Pawlu fil-gżejjer tagħna? F’dan il-pajjiz dieħla mewġa ‘reliġjuża’: il-lajċiżmu li bil-mod il-mod qiegħed iġarraf il-binja tal-Knisja fostna.

Ma tantx qed nara membri fi ħdan il-Knisja illi għandhom il-kuraġġ li jqumu fuq riġlejhom, u jagħtu tweġiba lis-soċjetà tal-lum mingħajr ma jibżgħu li jiġu mwarrba.

Forsi aħna ma narawhiex tinħatt ġebla ġebla, imma għad narawha tinħatt bniedem bniedem, wieħed wieħed. Forsi ma jitilqux mill-komunità, imma fil-Knisja għandna min qed jgħix b’sieq waħda ġewwa u oħra barra.

Nistaqsi: jekk l-Knisja għarfet tipproduċi fi ħdanha Kristjani maturi mimlijin bl-ispirtu tal-Vanġelu illi taw kontribut, x’ġara minnha llum? Jista’ jkun li minkejja tant stejjer glorjużi, ħallew lilhom infushom jinħakmu minn ċerta telqa, minn ċerti kurrenti u duttrini, u allura kollox sfaxxa fix-xejn?

X’garanzija għandna aħna illi, bl-istorja reliġjuża tagħna kollha, bl-imħabba tagħna kollha lejn il-qaddisin, illum ma nistgħux ukoll niġu feruti, b’mod jew ieħor, u allura niddgħajfu, tonqos il-konsistenza bejnietna, u nkunu iktar priża għall-għadu li hemm fuq l-għatba tal-bieb? Dan qed ngħidu mhux biex naqtgħu qalbna, imma għaliex nemmen, kif diġà għidtilkom, illi jekk il-komunità Kristjana tagħraf tgħix b’mod awtentiku l-imħabba tagħha lejn Kristu, lejn il-qaddisin l-imħabba tagħha lejn il-Knisja, u tkun ‘Knisja waħda,’ allura nkunu nistgħu nilqgħu kontra dak illi jista’ jfixkilna jekk mhux ukoll jeqridna.”

Ejjew nitolbu lil Alla bl-interċessjoni ta’ San Silvestru illi jieqaf magħna biex l-għaġna ta’ ħajjitna nagħġnuha bil-frak tal-istorja tiegħu u bil-frak tal-virtujiet li huwa għex u ngħixu tassew bħala poplu Nisrani li kapaċi jieqaf quddiem it-theddid ta’ żminijietna. Ejjew inkunu kapaċi nagħtu tweġiba evanġelika lid-dinja tal-lum.

Talba: Mulej, agħti l-għajnuna lill-poplu tiegħek bil-qawwa tat-talb tal-Papa San Silvestru, biex, wara ħajja taħt it-tmexxija tiegħek, naslu fil-hena tal-ħajja ta’ dejjem. Bi Kristu Sidna. Ammen. (Talba mil-Liturġija tas-Sigħat)

Liturġija tas-Sigħat: Agħfas fuq PDF jew WORD biex tniżżel id-dokument.

English Version: http://saintscatholic.blogspot.com/2011/12/saint-sylvester.html

Alternative Reading: https://www.catholicnewsagency.com/saint/st-sylvester-pope-101

Wikipedia: https://en.wikipedia.org/wiki/Pope_Sylvester_I 

Nota: It-Tagħrif dwar dan il-qaddis tal-lum huwa meħud mill-ktieb “Qaddisin fil-Liturġija tal-Knisja Universali”, miktub minn Dun Anton Sammut.