1 ta’ Lulju: Beatu Nazju Falzon

Verżjoni Vidjo: Beatu Nazju Falzon

“Fl-imġiba tiegħu magħhom (in-nies tas-Servizzi Ingliżi), li ftit biss minnhom kienu Kattoliċi, għex minn qabel l-ispirtu ekumeniku ta’ rispett u djalogu, li llum aħna midħla tiegħu imma li dak iż-żmien ma kienx daqshekk mifrux.” – Il-Qaddis Papa Ġwanni Pawlu II dwar il-Beatu Nazju Falzon f’Jum il-Beatifikazzjoni tiegħu.

BEATU NAZJU FALZON
Kjeriku
1813 – 1865

Nazju Falzon twieled fl-1 ta’ Lulju, 1813 fil-belt Valletta, minn ġenituri magħrufa għall-onestà u t-tjubija tagħhom. Missieru kien l-Avukat Ġużeppi Falzon li wara laħaq imħallef; u ommu, is-Sinjura Marija Tereża Debono. Nazju ġie mgħammed l-għada li twieled, fil-Knisja ta’ San Duminku tal-Belt.

Kien tifel intelliġenti u mexa ħafna ’l quddiem fl-iskola, mhux biss fi grad elementari u sekondarju, iżda wkoll fl-università fejn studja kemm il-liġi kif ukoll it-teoloġija. Meta kellu 21 sena kien diġà kiseb lawrja ta’ avukat u oħra fit-teoloġija.

Minħabba l-umiltà tiegħu, Nazju ma riedx isir saċerdot u ħa biss l-ordnijiet minuri fl-1831. Kellu żewġ ħutu saċerdoti Mons. Kalċidon u Mons. Franġisk, kamrier sigriet tal-Papa.

Il-fidi kbira tiegħu kienet tidher fil-qima li kellu lejn Ġesù fl-Ewkaristija. Anke meta kellu l-istudju u l-eżamijiet qatt ma ħalla l-quddiesa u t-tqarbina ta’ kuljum. Kien iżur diversi knejjes fl-istess jum biex jinviżta lil Ġesù Sagramentat u skont ix-xhieda ta’ Patri Franġiskan, Nazju ġieli dam tliet sigħat għarkupptejh quddiem it-tabernaklu.

Nazju Falzon f’ħajtu għamel ħafna karità moħbija; ġieli bagħat il-flus lil xi familji u foqra u dejjem iwissihom biex ma jgħidu lil ħadd. Iżda wara mewtu xandru ma’ kullimkien il-ġenerożità tiegħu.

Il-karità spiritwali li kellu l-Beatu Falzon dehret fuq kollox fit-tagħlim tad-duttrina li kien jagħti mhux biss lit-tfal, iżda wkoll lill-kbar: mas-suldati u mal-baħrin Ingliżi, Nazju wettaq appostolat ta’ konverżjonijiet, wassalhom biex jaċċettaw il-Fidi Nisranija. Flimkien ma’ ħuh Mons. Kalċidon, wassal għall-konverżjoni iktar minn 600 żagħżugħ u raġel, kemm Protestanti kif ukoll xi Lhud u Għarab.

Ħadem ħafna wkoll għall-vokazzjonijiet, kien devot kbir tal-Imqaddsa Verġni Marija u sa mewtu, minn mindu kellu 7 snin ħa d-drawwa li jirreċita 15-il posta tar-Rużarju ta’ kuljum. Kien jitkellem bl-ikbar ħeġġa fuq il-qawwa tar-Rużarju Mqaddes. Kellu wkoll devozzjoni tal-ħames salmi, barra milli kien jgħid kuljum l-uffiċċju ż-żgħir tal-Madonna.

Huwa miet fl-1 ta’ Lulju, 1865 proprju dakinhar li għalaq 52 sena. Xħin qam filgħodu, ħassu ma jiflaħx, għalhekk qal lil ħuh, “Għażiż ħija, ser nitolbok, li llum ma tħallinix.” Wara li għamel xi ħin jitlob, assistit minn ħuh, ħalla din d-dinja u ngħaqad m’Alla għal dejjem.

Ġie bbeatifikat f’Malta nhar id-9 ta’ Mejju tas-sena 2001, mill- Qaddis Papa Ġwanni Pawlu II fl-għeluq tal-pellegrinaġġ ġubilari tiegħu fuq il-passi ta’ San Pawl, li ħadu wkoll fil-Greċja u s-Sirja.

Ħsieb: Dan hu kliem il-Papa San Ġwanni Pawlu II dwar il-Beatu Nazju Falzon:

“Il-Qaddej ta’ Alla Nazju Falzon ukoll kellu ħerqa biex jipprietka l-Evanġelju u jgħallem il-fidi Kattolika. Huwa wkoll uża t-talenti u t-taħriġ intellettwali tiegħu għas-servizz tal-ħidma kateketika. L-Appostlu Pawlu kiteb li ‘kull wieħed għandu jagħti skont ma jidhirlu hu minn rajh, mhux fuq il-qalb jew bilfors; għax Alla jħobb lil min jagħti bil-ferħ.’ (2 Korintin 9:7) Il-Beatu Nazju kien wieħed li ta bil-bosta u bil-qalb; u n-nies raw fih mhux biss enerġija bla tarf imma wkoll paċi profonda u mħabba. Ċaħad is-suċċess tad-dinja li kien imħejji għalih mit-trobbija tiegħu biex jaqdi l-ġid spiritwali ta’ oħrajn, inklużi l-ħafna suldati u baħrin Ingliżi li kienu stazzjonati Malta dak iż-żmien. Fl-imġiba tiegħu magħhom, li ftit biss minnhom kienu Kattoliċi, għex minn qabel l-ispirtu ekumeniku ta’ rispett u djalogu, li llum aħna midħla tiegħu imma li dak iż-żmien ma kienx daqshekk mifrux.

Nazju Falzon ħa l-qawwa u l-ispirazzjoni mill-Ewkaristija, mit-talb quddiem it-Tabernaklu, mid-devozzjoni lejn Marija u lejn ir-Rużarju, u mill-imitazzjoni ta’ San Ġużepp. Dawn huma għejun ta’ grazzja minn fejn l-insara kollha jistgħu jixorbu. Il-qdusija u l-ħeġġa għas-saltna ta’ Alla jitkattru speċjalment fejn il-parroċċi u l-komunitajiet iħeġġu t-talb u d-devozzjoni lejn is-Sagrament Imqaddes. Inħeġġiġkom, mela, biex tgħożżu t-tradizzjonijiet tagħkom Maltin ta’ qima, filwaqt li ssaffuhom fejn meħtieġ u ssaħħuhom b’tagħlim u katekeżi sodi. M’hemmx triq oħra aħjar biex tqimu l-memorja tal-Beatu Nazju Falzon.”

Fil-Volum “Positio Super Virtutibus” li fih inġabru d-dokumenti kollha fuq il-ħajja tal-Beatu Nazju Falzon biex beda l-proċess tal-Kanonizzazzjoni, insibu fatt ħelu dwar vokazzjoni ta’ Patri Franġiskan Konventwal. Fi żmien Nazju, pajjiżna kien kolonja Ingliża u għalhekk il-portijiet Maltin kienu mimlija suldati u baħrin Ingliżi. Fi żmien il-Gwerra tal-Krimea (1853-1856) ħafna reġimenti, kienu stazzjonati f’Malta. Fil-Port il-Kbir kont tara ankrati vapuri tal-flotta Ingliża, bid-duħħan ħiereġ miċ-ċmieni sofor tagħhom dejjem lesti biex isalpaw għal xi destinazzjoni ġdida.

Il-Beatu Nazju Falzon li kien imdawwar minn mijiet ta’ suldati u baħrin Ingliżi li ta’ kuljum kienu jimlew it-toroq tal-Belt xtaq li jkun ta’ ġid għalihom. Kellu bħal don speċjali kif kien jitħabbeb magħhom u kien jistidinhom għal-laqgħat tad-duttrina. Għall-ewwel kien jiġborhom fid-dar tiegħu fi Triq id-Dejqa l-Belt. Dawn kienu jkunu fil-maġġoranza tagħhom Kattoliċi Irlandiżi. Magħhom kien ikun hemm oħrajn li kienu jitħajru jitgħammdu. Oħrajn kienu jmorru biex jiftħu qalbhom miegħu. Mhux biss, iżda ħafna drabi kien isir jaf personalment il-familja tagħhom, b’mod speċjali ta’ dawk li kienu stazzjonati f’Malta u kien jieħu ħsiebhom spiritwalment.

Il-familja Doyle ta’ nazzjonalità Irlandiża kienet għadha kemm waslet Malta minn Korfu u ġiet togħqod f’Tas-Sliema. Mill-ewwel saret midħla tal-Beatu Falzon u flimkien ma’ wliedhom kienu jmorru l-Belt biex jgħidu r-rużarju fil-laqgħat li l-Beatu kien jagħmel fil-Knisja tal-Ġiżwiti.

Darba wieħed mit-tfal tal-Familja Doyle, li kien jismu Frederick, kellem lill-Beatu Falzon biex jieħu parir dwar il-vokazzjoni reliġjuża tiegħu. Hu xtaq isir Franġiskan. Nazju Falzon kien ilu jsegwi liż-żagħżugħ b’interess kbir. Jum fost l-oħrajn ħadu fil-kunvent ta’ San Franġisk fi Triq Irjali (illum Triq ir-Repubblika), il-Belt Valletta. Hemm sab lill-Majjistru Patri Pawl Anton Sillato (1803-1877), Superjur tal-Franġiskani Konventwali ta’ Malta, saċerdot bravu u ta’ ħajja qaddisa. Patri Sillato kien magħruf sew fost il-Kleru kollu ta’ Malta, minħabba li f’dak iż-żmien kien id-Direttur Spiritwali tas-¬Seminarju tal-Isqof, fi Triq San Kalċidon, il-Furjana. Il-Beatu Nazju Falzon ħalla liż-żagħżugħ f’idejh u Patri Sillato bi mħabba kbira laqa’ lil Frederick Doyle fil-kunvent.

Kien is-sajf tas-sena 1853. Patri Sillato avviċina lill-ġenituri taż-żagħżugħ, Patrick u Jane Doyle, u wara ftit taż-żmien it-tifel tagħhom Frederick daħal mal-Patrijiet ta’ San Franġisk ta’ Putirjal il-Belt. Frederick Doyle twieled Longford, fl-Irlanda, fl-4 ta’ Frar 1641. Fit-30 ta’ Diċembru, 1853 libes l-abitu Franġiskan għall-ewwel darba fil-knisja ta’ San Franġisk il-Belt. Tawh l-isem ta’ Fra Frederick Bonaventure. Ftit wara mar Sqallija u beda l-istudju tal-Letteratura fis-Seminarju tal-Franġiskani f’Messina. Imbagħad wara sentejn is-Superjuri bagħtuh fil-Kunvent ta’ Santi Appostoli f’Ruma fejn għamel is-sena tan-Novizzjat. Fis-17 ta’ Settembru 1857, festa tal-Pjagi ta’ San Franġisk għamel il-Professjoni Solenni.

Fra Frederick Bonaventure kompla l-istudju tal-filosofija f’Recanati fil-Provinċja tal-Marche fl-Italja. Kien żmien meta l-Ordni tal-Franġiskani Konventwali kien qiegħed ifittex jiftaħ dar ġdida fl-Istati Uniti tal-Amerika. Għalhekk fis-sena 1858, Fra Frederick Bonaventure ntgħażel biex imur l-Amerika mal-ewwel grupp ta’ patrijiet. Kien għadu student. Fl-Istati Uniti studja t-teoloġija u kien ordnat Saċerdot.

Patri Frederick Bonaventure Doyle ħadem fost l-emigranti Irlandiżi fi New York. Fis-sena 1865 reġa’ lura fl-Italja u kien konfessur għal-lingwa Ingliża fis-Santwarju ta’ Loreto. U mbagħad fis-sena 1870 sar penitenzier appostoliku fil-Bażilka ta’ San Pietru fil-Vatikan. Fis-sena 1876 irċieva l-Lawrja fit-Teoloġija.

Matul dan iż-żmien kien qiegħed iħossu muġugħ u marid ħafna. Is-saħħa baqgħet dejjem tonqsu u għalhekk fuq il-parir tat-tobba reġa’ lura lejn l-Amerika fil-25 ta’ Ottubru, 1878. Patri Doyle waqt il-marda twila tiegħu kien ta’ eżempju għal kulħadd. Il-bidu tal-vokazzjoni reliġjuża kienet ir-reċita tar-rużarju ta’ kuljum fil-¬knisja tal-Ġiżwiti flimkien mas-suldati u sa l-aħħar nifs ta’ ħajtu baqa’ devot tal-Madonna, kif għallmu jagħmel dejjem il-Beatu Nazju Falzon.

Patri Frederick Bonaventure Doyle miet fil-Kunvent ta’ St. Joseph, 702 Columbia Street, Utica, New York, fis-sena 1885.

Ejjew inroddu ħajr minn qalbna lil Alla l-Missier, li fil-ħniena kbira tiegħu, għoġbu jagħżel lil dan ħuna, Malti bħalna u Belti, biex ikun eżempju ta’ qdusija u ta’ impenn fit-tixrid tat-tagħlim tal-Bxara t-Tajba lil ħutu Maltin u lill-barranin.

U int, issib il-qawwa u l-ispirazzjoni tiegħek:

• mill-Ewkaristija, mit-talb quddiem it-Tabernaklu?
• mid-devozzjoni lejn Marija u lejn ir-Rużarju?
• u mill-imitazzjoni ta’ San Ġużepp?

Talba: Mulej, Alla tagħna, int fil-kobor tal-ħniena tiegħek, tagħżel minn fostna bnedmin bħalna biex iservuna u jgħinuna niksbu u nżommu d-don tal-fidi u tal-paċi tiegħek. Aħna niżżukħajr għall-grazzja li għoġbok tagħżel minn fostna lil ħuna l-Beatu Nazju Falzon, li bit-tagħlim u l-ħidma tiegħu kien ta’ għajnuna għall-Maltin u s-suldati ta’ żmienu; bit-talb tiegħu, ħa jkun illum ta’ konfort għalina u għal kull min jersaq lejh. Nitolbuk li jekk hi r-rieda tiegħek, jiġi magħdud fost il-qaddisin tiegħek. Ammen.  

English Version: https://catholicsaints.info/blessed-nazju-falzon/

Alternative Reading: http://ginadwithsaints.blogspot.com/2011/07/day-300-blessed-nazju-falzon.html

Wikipedia: https://en.wikipedia.org/wiki/Nazju_Falzon

Nota: It-Tagħrif dwar dan il-qaddis tal-lum huwa meħud mill-fuljett Signum Fidei. Parti mill-Ħsieb huwa kitba ta’ P. Arthur Joseph Saliba OFMConv.

16 ta’ Jannar: San Berardu u sħabu

Verżjoni Vidjo: San Berardu u sħabu

“Morru fid-dinja kollha, xandru l-Evanġelju lill-ħolqien kollu. Min jemmen u jitgħammed, isalva; iżda min ma jemminx, ikun ikkundannat.” – Ġesù f’Mark 16:15-16

SAN BERARDU U SĦABU
Martri tal-Marokk
†1220

Tagħrif: San Franġisk t’Assisi kien iħoss li Alla ried minnu mhux biss il-perfezzjoni tiegħu u tal-patrijiet tiegħu, imma wkoll is-salvazzjoni tal-bnedmin l-oħra. Kien iħoss xewqa kbira li jikkonverti lill-Musulmani, li l-avvanz tagħhom fil-pajjiżi ewropej kien ukoll qed jhedded ir-reliġjon Nisranija.

Waqt li flimkien ma’ kumpann mar lejn l-Orjent biex ikellem lis-sultan Musulman, Franġisk bagħat sitt patrijiet biex jipprietkaw lill-Musulmani tal-Punent. Dawn kienu: Vitale, Berardu, Pietru, Akkursju, Adjutu u Ottone. Fi triqthom, Vitale, li kien is-superjur tal-grupp, marad serjament fi Spanja, u sħabu komplew triqthom taħt il-gwida ta’ Berardu.

F’Sivilja, fin-naħa t’isfel ta’ Spanja, li kienet maħkuma mill-Misilmin, il-patrijiet bdew jipprietkaw bla biża’ fil-moskea, li s-salvazzjoni tinsab biss fil-fidi fi Kristu. Il-mexxej musulman, inkurlat għall-aħħar, ordna li jaqtgħulhom rashom dak il-ħin stess. Imma wara tħallew jaqsmu l-baħar u jmorru l-Marokk. Il-patrijiet laqgħu b’ferħ din id-deċiżjoni għax issa kienu se jkunu fost poplu kollu kemm hu Musulman.

Hekk kif waslu, Berardu, li kien jitkellem tajjeb l-ilsien Għarbi, beda mill-ewwel jitkellem man-nies fuq Kristu. Jum minnhom, meta raw lir-re Miramolin imdawwar bin-nies tiegħu, Berardu reġa’ beda jitkellem fuq it-tagħlim ta’ Kristu u sejjaħ lil Mawmettu bħala impustur. Ir-re ordna li Bernardu u sħabu jitkeċċew mill-pajjiż, imma rnexxielhom jiżgiċċaw lill-gwardji u reġgħu lura jxandru l-istess tagħlim.

Berardu u sħabu ttieħdu quddiem ir-re, li wegħedhom ħafna ġid u postijiet ta’ ġieħ jekk isiru Musulmani. Imma Berardu f’isem sħabu qallu li ma kinux lesti jiċħdu lil Kristu, anzi beda jħeġġeġ lir-re jikkonverti għall-vera fidi. Meta ra li kollox kien għalxejn, ir-re nnifsu qabad ix-xabla u qatel lil kull wieħed mill-patrijiet. Kien is-16 ta’ Jannar, 1220. Kienu l-ewwel martri Franġiskani.

Meta San Franġisk sema’ bil-mewt ta’ dawn il-patrijiet, bierek lil Alla u qal: “Issa naf li tassew għandi Patrijiet Minuri.” Għall-għadd kbir ta’ mirakli li saru bl-interċessjoni tagħhom, il-Papa Sistu IV ddikjara lil Berardu u sħabu bħala qaddisin fl-1481.

Ħsieb: Kien fil-kapitlu ġenerali ta’ Pentekoste li sar fil-Porzjunkola fl-1217 li San Franġisk iddeċieda li jibgħat lill-patrijiet minuri jevanġelizzaw barra mill-Italja. Il-missjunarji Franġiskani marru lejn Spanja u l-Portugall, li kienu parzjalment maħkuma mill-Misilmin. Il-ħidma ta’ evanġelizzazzjoni wasslet xi wħud minnhom għall-martirju. Fis-16 ta’ Jannar Fra Berardu u erba’ Franġiskani sħabu ġew immartirizzati fil-belt ta’ Marrakesh fil-Marokk. Il-Franġiskani qasmu l-Alpi lejn Franza, il-Ġermanja, l-Ungerija u l-Bosnja. Aktar tard, fl-1224, qasmu wkoll il-kanal tal-Ingilterra u waslu Dover.

Dan li ġej huwa l-Messaġġ tal-Qdusija tiegħu Papa Franġisku għall-Ġurnata Missjunarja Dinjija 2018, bit-titlu ‘Flimkien maż-Żgħażagħ inwasslu l-Evanġelju lil kulħadd’:

“Ħafna rġiel u nisa, ħafna żgħażagħ taw lilhom infushom b’ġenerożità – xi drabi anki sal-martirju – għall-imħabba tal-Evanġelju, fil-qadi ta’ ħuthom il-bnedmin. Mis-salib ta’ Ġesù nitgħallmu l-loġika divina li twassalna biex noffru lilna nfusna (1Korintin 1:17-25) bħala tħabbira tal-Evanġelju għall-ħajja tad-dinja (Ġwanni 3:16). Meta nitkebbsu bl-imħabba għal Kristu, nikkunsmaw lilna nfusna f’dan in-nar, u dan ikabbarna, jdawwalna u jsaħħan lil qlubna (2Korintin 5:14). Nistedinkom għall-iskola tal-qaddisin li jiftħulna orizzonti kbar li jwasslu għand Alla, u f’kull ċirkustanza staqsu lilkom infuskom: ‘X’kien jagħmel Kristu kieku kien minfloki?’

Nittrażmettu l-fidi sa trufijiet l-art
It-tixrid tal-fidi permezz tal-attrazzjoni jitlob qlub miftuħa, imfawra bl-imħabba. L-imħabba ma tistax tpoġġilha limitu: għaliex l-imħabba hi qawwija bħall-mewt (ara Għanja tal-Għanjiet 8:6). Dan it-tixrid tal-fidi jiġġenera ‘encounter’, xhieda, tħabbira; jiġġenera l-qsim fil-karità ma’ dawk kollha li huma ‘l bogħod mill-fidi, li huma indifferenti u xi drabi forsi anki ostili u kontra l-fidi. Ambjenti umani, kulturali u reliġjużi li huma barranija għall-Evanġelju ta’ Ġesù u għall-preżenza sagramentali tal-Knisja jirrappreżentaw il-periferiji estremi. Dawn huma ‘t-trufijiet tal-art’ fejn Ġesù bagħat lid-dixxipli missjunarji tiegħu sa minn meta qam mill-mewt, filwaqt li żgurhom li l-Mulej ser jibqa’ dejjem magħhom (Mattew 28:20; Atti 1:8). Dan hu dak li aħna nsejħulu missio ad gentes. Il-periferija l-aktar deżolata tal-umanità, li tant għandha bżonn ta’ Kristu, hija dik fejn hemm l-indifferenza lejn il-fidi, u jekk mhux ukoll il-mibegħda kontra il-milja divina tal-ħajja. Kull faqar materjali u spiritwali, kull diskriminazzjoni lejn ħutna hi dejjem konsegwenza taċ-ċaħda t’Alla u tal-imħabba tiegħu.

It-trufijiet tal-art kollha llum saru għalikom xi ħaġa relattiva u faċli taslu biex ‘tinnavigaw’ fiha. Id-dinja diġitali – in-networks soċjali li faċli ssibhom u li xterdu ma’ kullimkien – xejnu l-fruntieri, eliminaw id-distanzi u naqqsu d-differenzi. Kollox jidher li tista’ tasal għalih malajr, kollox qrib u immedjat. Iżda mingħajr ir-rigal sinċier tal-ħajja jista’ jkollna eluf u eluf ta’ kuntatti, iżda qatt ma naslu għal vera komunjoni tal-ħajja. Fil-vokazzjoni mogħtija lilna minn Dak li poġġiena fuq din l-art, il-missjoni sa trufijiet l-art titlob minna r-rigal tagħna nfusna (Luqa 9:23-25). Nazzarda ngħid li għal żagħżugħ li jrid jimxi wara Kristu, l-aktar ħaġa essenzjali hi li jfittex xinhi il-vokazzjoni tiegħu u jippersevera fiha.

Xhieda tal-imħabba
L-Opri Missjunarji Pontifiċji twieldu minn qlub żagħżugħa biex jgħinu ħalli t-tħabbira tal-Evanġelju tasal għand il-bnedmin kollha filwaqt li jagħtu sehemhom għall-iżvilupp uman u kulturali ta’ tant ġnus bil-għatx għall-Verità. It-talb u l-għajnuna materjali, mogħtija b’tant ġenerożità u mqassmin mill-OMP, jgħinu lis-Santa Sede biex filwaqt li twassal l-għajnuna lil dawk li jeħtieġuha, tara li dawn ukoll ikunu kapaċi jagħtu xhieda fl-ambjenti fejn jgħixu. Ħadd mhu daqshekk fqir li ma jista’ jagħti xejn minn dak li għandu, u qabel kollox minn dak li hu. Nixtieq nerġa’ ntenni l-kliem li għidt liż-żgħażagħ taċ-Ċili: ‘Qatt m’għandek taħseb li m’għandek xejn x’tagħti jew li m’għandek bżonn ħadd. Kun af li ħafna nies għandhom bżonnok. Kull wieħed jgħid f’qalbu: ħafna nies għandhom bżonni.’ (Laqgħa maż-żgħażagħ fis-Santwarju ta’ Maipu, 17/01/2018)

• U int, qed ixxandar lil Kristu bi kliemek imma l-aktar mill-mod kif tgħix?
• Qed tgħix il-missjoni li Alla sejjaħlek għaliha u li ħadd ħliefek ma jista’ jwettaq għax hi s-sejħa personali tiegħek?
• Taf li ma tistax issalva waħdek u li hemm persuni li Alla ħalla f’idejk biex tressaqhom lejh ħalli hu jsalvahom?
• Kemm qed tkun ġeneruż/a fis-sejħa tiegħek bħala Nisrani/ja li twassal lil Kristu lill-oħrajn? Lest/a li tirriskja u tiġi mżeblaħ/mżebilħa, imwarrab/a jew maqtul/a għall-fidi tiegħek bħal Berard u sħabu?

Talba: Nitolbu lil Marija Sultana tal-Appostli, lil San Franġisk Saverju, lil Santa Tereża tal-Bambin Ġesù, lill-Beatu Paolo Manna u b’mod speċjali llum lil San Berardu u sħabu f’jum it-tifkira tagħhom, biex jidħlu għalina lkoll u jakkumpanjawna fil-vjaġġ missjunarju tagħna ħalli aħna wkoll inkunu xhieda awtentiċi ta’ Kristu akkost ta’ kull saġrifiċċju. Bi Kristu Sidna. Ammen.

English Version: http://saintscatholic.blogspot.com/2014/02/saint-berard-and-companions.html

Alternative Reading: https://www.franciscanmedia.org/saint-of-the-day/saint-berard-and-companions/

Wikipedia: https://en.wikipedia.org/wiki/Berard_of_Carbio

Nota: It-Tagħrif dwar dawn il-qaddisin tal-lum huwa meħud mill-fuljett Signum Fidei.

1 ta’ Diċembru: San Charles de Foucauld

Verżjoni Vidjo: San Charles de Foucauld

“Meta skoprejt u bdejt nemmen li hemm Alla, fhimt li ma stajt nagħmel xejn aktar ħlief ngħix biss għalih.” – San Charles de Foucauld

SAN CHARLES DE FOUCAULD
1858 – 1916

Tagħrif: Charles de Foucauld twieled fi Strasburgu, fi Franza, u safa ltim meta kellu 6 snin. Nannuh min-naħa ta’ ommu, li kien raġel għani, rabba’ lilu u lil oħtu 3 snin iżgħar minnu.

Għadda żgħożitu fix-xalar. Wara li ngaġġa suldat, kellhom ikeċċuh minħabba imġibtu. Imma mbagħad reġa’ qabad il-karriera militari u fl-1883, mar fi spedizzjoni fid-deżert tal-Marokk u kiteb deskrizzjoni tajba ħafna ta’ dan il-pajjiż li rebbħitu midalja tad-deheb mis-Soċjetà Ġeografika Franċiża.

Huwa kkonverta għall-ħajja reliġjuża fl-1886 meta kellu 28 sena wara li kien mar għall-parir għand is-saċerdot Henri de Huvelin li mbagħad baqa’ jgħinu fid-direzzjoni spiritwali. Sentejn wara Charles mar pellegrinaġġ għall-Art Imqaddsa.

Wara esperjenza bħala Trappista fis-Sirja u bħala eremit f’Nazaret, huwa kien ordnat saċerdot fl-1901 meta kellu 43 sena. Għex fil-faqar, fil-kontemplazzjoni u fl-umiltà, jagħti xhieda ta’ mħabba, fraternità fost l-Insara, il-Lhud u l-Musulmani. Huwa kien jaf tajjeb l-Għarbi u l-Lhudi.

Biex jimita l-ħajja moħbija ta’ Ġesù f’Nazaret, de Foucauld mar jgħix f’Tamanrasset, fil-qalba tad-deżert tas-Saħara. Kiteb diversi kotba fuq it-Twareg, membri tal-poplu Berberu tas-Saħara tal-punent u ċentrali, fosthom ktieb tal-grammatika u dizzjunarju Franċiż-Twareg.

Huwa kellu ħsieb iwaqqaf il-Fraternità tal-Qalb Imqaddsa. Magħrufin bħala l-Aħwa ż-Żgħar ta’ Ġesù, bl-iskop li jevanġelizzaw it-Twareg. Din il-ħolma tiegħu saret realtà wara mewtu permezz ta’ Dun Réné Voillaume u ta’ Sr. Magdeleine Hutin.

Charles de Foucauld kien maqtul b’tir fl-1 ta’ Diċembru, 1916 waqt l-irvellijiet fost il-Berberi ta’ Hoggar. Kien iddikjarat beatu fit-13 ta’ Novembru, 2005 u qaddis fl-14 ta’ Mejju tat-2022.

Ħsieb: Dan hu kliem meħud minn omelija tal-Isqof Pawlu Cremona O.P. dwar San Charles de Foucauld (19 ta’ Lulju, 2013):

“Meta l-Mulej ġie fuq din l-art, seta’ ġie bil-kburija biex juri d-divinità tiegħu. Dan kien ikun f’konformità ma’ dak li l-bnedmin jaħsbu dwar id-Divinità: il-kobor tagħha, l-infinità tagħha. Minflok, Sidna Ġesù Kristu għażel ix-xejn, il-faqar, l-umiltà biex jiġi fostna. Ried li aħna nersqu lejh b’mod spiritwali: billi fix-xejn u fl-umiltà, permezz tat-tagħlim u s-sinjali tiegħu, aħna naraw id-Divinità tiegħu.

Dan li aħna nsibu fil-Vanġelu ta’ Luqa 14:8-14: li l-mixja lejn Alla ġiet murija lilna minn Sidna Ġesù Kristu. Il-mixja lejn Alla trid tgħaddi mill-umiltà: huwa Alla li mbagħad jintervjeni biex jagħtina post fil-ħajja eterna. Barra minn hekk, l-imħabba pura, billi ma tistenna xejn mill-oħrajn, hija kontinwazzjoni ta’ din it-tfittxija għal Alla: l-imħabba lejn l-oħrajn għandha takkompanja t-tfittxija għall-imħabba t’Alla. L-imħabba ta’ Charles lejn l-oħrajn tirrifletti din l-imħabba. Fir-Regola tal-“Little Brothers” insibu: ‘L-appostolat tiegħi għandu jkun l-appostolat tat-tjieba. Kieku xi ħadd kellu jistaqsi għaliex jien manswet u twajjeb, jiena għandi ngħid: il-għaliex jien l-qaddej ta’ xi ħadd li huwa aħjar minni.’

Charles kien iħares lejn il-bnedmin kollha fid-dawl tal-fidi tiegħu. Dawn il-versi mill-Ktieb tal-Għerf, ċertament ispirawh tul ħajtu kollha: ‘Iżda int tħenn għal kulħadd, għax tista’ kollox; int tagħlaq għajnejk għal dnubiet il-bnedmin biex huma jindmu… Int, o Sid, li tħobb kull ma jgħix, lil kulħadd tagħder, għax kollox huwa tiegħek, Mulej li tħobb il-ħajja’ (ara Għerf 11:23-12,2). F’dawn il-versi nistgħu nifhmu aħjar il-mod kif Charles kien iħares lejn bnedmin oħra, kemm jekk kienu ta’ razza oħra bħat-Touareg, jew ta’ reliġjon oħra bħall-Musulmani. Irridu niftakru li l-ewwel pass tiegħu lejn il-konverżjoni wasal meta ra Musulmani devoti jitolbu.

Fil-perjodu tal-ħajja li Charles de Foucauld għadda f’Nazaret, kien tfittxija ta’ din il-kwalità ta’ spiritwalità: ‘Il-Mulej tani l-ħila biex insib dak li kont qed infittex: l-imitazzjoni ta’ dik li kienet il-ħajja tal-Mulej Ġesù, fl-istess Nazaret…’ ‘Nixtieq ħafna li fl-aħħar mill-aħħar nibda ngħix dik il-ħajja li skoprejt meta kont nimxi f’Nazaret, f’dawk il-mogħdijiet li mxew fuqhom ir-riġlejn tal-Mulej, li kien mastrudaxxa jgħix moħbi u emarġinat.’

Wara sebgħa snin ta’ spiritwalità li għex mal-Patrijiet Trappisti, mar l-Art Imqaddsa, biex ifittex li jkun tassew segwaċi ta’ Ġesù. Nistgħu ngħidu li l-ħajja tiegħu wara l-konverżjoni tiegħu kienet maqsuma fi tliet stadji. L-ewwelnett mar għand il-Patrijiet Trappisti fejn skopra l-ispiritwalità, li tkun viċin t’Alla. Imbagħad mar l-Art Imqaddsa fejn dam għal erba’ snin sas-sena 1900: hawn b’mod speċjali skopra il-mixja ta’ Kristu fuq l-art, biex jimitah. Wara li sar saċerdot fl-1901 mar jgħix ta’ eremit, imma fi fraternità, billi fetaħ id-dar tiegħu għal kulħadd. Hawn seta’ jgħix il-kliem tal-Vanġelu li fil-bidu biddillu ħajtu. Waqt li kien fl-Alġerija, ftit xhur qabel ma miet huwa kiteb: ‘Jien nemmen li m’hemmx kelma fil-Vanġelu li ħalliet impressjoni iktar profonda fija u bidlitli ħajti minn din: “kull ma tagħmlu mal-iżgħar minn dawn, tagħmluh lili.’ Reġa’ kiteb: ‘Nixtieq li l-bnedmin kollha li jgħixu hawn, jaraw fija lil ħuhom, ħuhom universali. Diġà bdew isejħu din id-dar ‘Aħwiġa’ jew ‘Fraternità’ u dan l-isem jagħtini ferħ kbir.’

Hawn se nagħmlu riflessjoni fuq iż-żmien li San Charles għadda f’Nazaret. Imma x’kien Nazaret għal Sidna Ġesù Kristu?

Kien post fejn seta’ jgħix maqtugħ min-nies, f’ħajja moħbija, imma post ukoll fejn tkompliet l-Inkarnazzjoni. Għex għal tletin sena fost niesu, u sar jafhom sewwa. Charles de Foucauld kien jaf li l-uniku mod kif seta’ jiddjaloga ma’ bnedmin oħra, kien billi jkun jafhom, jitgħallem il-kultura tagħhom, il-lingwa tagħhom. Għalhekk għex magħhom, speċjalment mat-Touareg. Tgħallem il-lingwa tagħhom u saħansitra ħareġ dizzjunarju tal-lingwa tagħhom.

Nazaret kien il-post fejn tkompliet il-konverżjoni tiegħu; din bdiet permezz tar-reliġjożità tal-Musulmani għax l-ewwel kien mar il-Marokk. Nazaret kien il-post fejn iltaqa’ ma’ Ġesù Kristu, fit-tagħlim tiegħu, fil-Vanġeli, fil-ħajja tiegħu. Għalhekk mar Nazaret biex ikun viċin il-post fejn il-Mulej fl-umanità tiegħu, kompla jikber fil-grazzja, mdawwar bil-familja tiegħu. Għal Charles il-‘familja’ f’Nazaret kienu l-Klarissi li kienu jipprovdulu l-bżonnijiet tiegħu. Imma, f’Nazaret huwa għex il-kliem ta’ Sidna Ġesù Kristu li huwa ġie mhux biex ikun moqdi imma biex jaqdi, u dak li jixtieq ikun l-ikbar għandu jiġi l-aħħar. Huwa qala’ l-għajxien tiegħu billi ħadem ta’ qaddej għall-Klarissi: ‘li dejjem nixtieq li nkun tal-aħħar, fl-inqas post biex inkun ċkejken bħalma kien l-Imgħallem tiegħi.’

Il-Mulej stenna f’Nazaret sakemm huwa joħroġ ixandar il-Kelma. Għal Charles, Nazaret kien il-post fejn skopra l-vokazzjoni vera tiegħu: li jifforma fraternitajiet. Huwa għaraf li ż-żmien li għadda mat-Trappisti, iż-żmien li għadda bħala eremit, kienu biss tħejjija għall-missjoni aħħarija li l-Mulej riedu jwettaq ħalli jifforma fraternitajiet tal-“Little Brothers u l-Little Sisters” fil-Knisja kollha.

U hemmhekk skopra l-missjoni għas-saċerdozju. Ma kienx don personali li kien qiegħed ifittex, imma don għall-fraternità biex l-Ewkaristija Mqaddsa tkun dejjem preżenti fil-fraternità. Kien ordnat saċerdot fil-1901. Immedjatament mar l-Alġerija u fetaħ l-ewwel fraternità. Imbagħad fl-1904 mar għand it-Touareg fejn għex sal-aħħar ta’ ħajtu.

Jiena naħseb li San Charles de Foucauld ħalla dan il-wirt għall-posterità: Huwa qal li wieħed jista’ jgħix Nazaret kullimkien. Lill-fraternita’ tal-“Little Brothers u Little Sisters” huwa kiteb fir-“Rule of Life” tiegħu: ‘Nazaret għandha titniżżel u għandha tkun preżenti fl-imħabba.’ Huwa ttrasforma r-reliġjon fl-Imħabba. ‘Wieħed jista’ jgħix Nazaret kullimkien.’ ‘L-imħabba tikkonsisti mhux filli nħossu li aħna nħobbu imma illi nixtiequ li nħobbu.’ Hu wriena li l-qalb f’kull intrapriża hija l-Ewkaristija u l-Adorazzjoni.

Huwa ġie maqtul waqt li kien mat-Touareg. Huwa wriena l-urġenza li wieħed jagħmel il-ġid. Xi żmien qabel ma miet, huwa kiteb: ‘Ma nistax ngħid li nixtieq il-mewt. Fil-passat kont nixtieqha imma issa nara li hemm tant ġid li jrid isir, tant erwieħ mingħajr ragħaj, li iktar minn kull ħaġa oħra, nixtieq nagħmel xi ftit ġid.’ ‘Jenħtieġ li naqraw u nerġgħu naqraw mingħajr tlaqliq il-Kelma t’Alla, biex inżommu f’moħħna il-kliem u l-ħsibijiet ta’ Ġesù biex nibdew naħsbu, nitkellmu b’mod li nimitaw lil Ġesù.’

Talba: Missier, f’idejk nintelaq jiena. Agħmel minni dak li jogħġbok. Niżżikħajr għal dak kollu li tagħmel bija: Jien lest għal kollox, nilqa’ kollox. Agħmel biss li r-rieda tiegħek isseħħ fija, u fil-ħlejjaq kollha tiegħek. Ma nixtieq xejn aktar Mulej. F’idejk jien nitlaq ruħi; nagħtihielek bl-imħabba kollha ta’ qalbi, għax jien inħobbok, Mulej, u għalhekk inħoss il-ħtieġa li nagħti lili nnifsi lilek, li nintelaq f’idejk għal kollox u b’kunfidenza bla tarf, għax int Missieri. Ammen. (Talba ta’ San Charles de Foucauld)

English Version: http://www.charlesdefoucauld.org/en/biographie.php

Vatican Biography: https://www.franciscanmedia.org/saint-of-the-day/saint-charles-de-foucauld

Wikipedia: https://en.wikipedia.org/wiki/Charles_de_Foucauld

Nota: It-Tagħrif dwar din il-qaddisa tal-lum huwa meħud mill-fuljett Signum Fidei.

14 ta’ Novembru: San Nikola Tavelić u sħabu

Verżjoni Vidjo: San Nikola Tavelić u sħabu

“Jien għalhekk twelidt, u għalhekk ġejt fid-dinja, biex nixhed għall-verità. U kull min iħobb il-verità jisma’ leħni.” – Ġesù lil Pilatu fi Ġwanni 18:37

SAN NIKOLA TAVELIC U SĦABU MARTRI
Reliġjuż
1340 – 1391

Tagħrif: Twieled fil-belt ta’ Sibenik, fil-Kroazja, madwar l-1340. Daħal mal-Franġiskani Konventwali ta’ belt twelidu u sar saċerdot madwar l-1365.

Għal 20 sena ħadem fil-Bosnija kontra l-ereżija tal-Patareni u tal-Manikej. Imma meta t-Torok daħlu fis-Serbja u fil-Kroazja, San Nikola deherlu li l-aħjar ħaġa li kellu jagħmel kienet li jmur missjunarju fl-Art Imqaddsa, biex jikkonverti lill-Misilmin. Telaq għalhekk ma’ tliet patrijiet oħra, Dijodatu minn Rodez, Franċiż, Stiefnu minn Cuneo, Taljan, li dawn kienu Konventwali bħalu, u Pietru minn Norbonne, Franċiż ukoll, li dan kien dixxiplu tal-Beatu Pauluccio Trinci, il-Fundatur fl-1368, tar-Riforma Osservanti.

Għexu għal xi żmien fil-kunvent ta’ Sijon, ħdejn iċ-ċenaklu. Imma fil-11 ta’ Novembru 1391, marru fil-Moskea ta’ Omar, mibnija flok it-tempju ta’ Ġerusalemm, u b’kuraġġ li ma jitwemminx, qalu lill-Qadi, li jekk ma jsirx Nisrani, ma jistax isalva. Il-Qadi wieġeb li jekk huma ma jsirux Misilmin jieħdu l-mewt.

Wara tlett ijiem, dawn l-erba’ Franġiskani mietu martri għal Kristu. Il-metodu tagħhom illum ma nifhmuhx, imma huma fil-fatt ħadu l-mewt biex ixandru lil Kristu. Għalhekk il-Papa Pawlu VI mar jikkanonizzahom fil-21 ta’ Ġunju, 1970.

Ħsieb: Fil-11 ta’ Novembru 1391, San Nikola Tavelić u sħabu marru quddiem il-Qadi ta’ Ġerusalemm fil-preżenza ta’ ħafna Musulmani, u esponew ruħhom, billi ppreżentaw l-argumenti tagħhom b’kuraġġ kbir.

Filwaqt li dawk preżenti semgħuhom bir-reqqa, m’aċċettawx kliemhom, u fl-aħħar inkurlaw għalihom u talbuhom jirrepetu dak li kienu qalu; l-erba’ patrijiet irrifjutaw u għalhekk ġew ikkundannati għall-mewt fi tlett ijiem, tqiegħdu l-ħabs fejn sofrew abbużi.

Fl-14 ta’ Novembru ġew miġjuba lura fit-toroq, għal darb’oħra ntalbu jerġgħu jgħidu dak li kienu qalu kontra l-Islam, wara li ċaħdu din l-opportunità finali biex isalvaw ħajjithom billi jiċħdu lil Kristu, qatgħulhom rashom u ħarquhom sabiex il-fdalijiet tagħhom ma jkunux jistgħu jiġu venerati bħala martri mill-Insara.

Il-martirju tagħhom ġie deskritt fid-dettall f’rapport mill-Gwardjan tal-Art Imqaddsa, Fr. Gerald Calvet, OFM, xaharejn wara l-mewt tagħhom.

Il-Papa Ġwanni Pawlu II kien konxju ħafna dwar ix-xhieda tal-martri fil-Knisja tagħna. Kull kontinent ġie minsus bid-demm tal-martri. Huwa ddeskriva l-martirju bħala “l-prova l-aktar elokwenti tal-verità tal-fidi.” Skont hu, din il-“prova tal-fidi” hija evidenzjata fi tliet modi:

• L-ewwel nett, il-martirju jafferma l-invjolabbiltà tal-ordni morali – kemm il-verità u l-qdusija tal-liġi ta’ Alla u d-dinjità tal-persuna umana.
• It-tieni nett, il-martirju jikkonferma l-umanità u l-ħajja vera tal-bniedem.
• U fl-aħħar, il-martirju jikkonferma l-qdusija tal-Knisja, bi preżentazzjoni ta’ xhieda impenjati għall-verità.

Fil-qosor, “bl-eżempju elokwenti u attraenti tagħhom ta’ ħajja kompletament trasformata mill-isplendur tal-Verità morali, il-martri u, b’mod ġenerali, il-qaddisin tal-Knisja kollha, jixegħlu kull perjodu ta’ Storja billi jqajmu s-sens morali tagħha” (L-Isplendur tal-Verità, # 93).

Għalhekk, irridu nkunu konxji tal-martri tal-Knisja tagħna, għax ix-xhieda tagħhom tagħmlilna kuraġġ u tagħtina tama kbira. Permezz tal-grazzja ta’ Alla, jalla aħna wkoll inkunu daqshekk impenjati lejn il-Mulej tagħna, lejn il-Knisja tiegħu, u lejn il-fidi kif kienu huma. Ejja nagħmlu tagħna l-kliem ta’ San Pawl:

“Ladarba aħna wkoll għandna madwarna sħaba hekk kbira ta’ xhieda, ejjew inwarrbu minna kull xkiel u kull dnub li malajr ifixkilna, u b’qalbna qawwija nibqgħu niġru t-triq tal-prova li għandna quddiemna; inżommu għajnejna merfugħa lejn Ġesù, li minnu tibda u fih tintemm il-fidi tagħna; hu li, flok l-hena li kellu quddiemu, qagħad għas-salib bla xejn ma qies l-għajb tiegħu, u issa qiegħed fuq in-naħa tal-lemin tat-tron ta’ Alla.” (Lhud 12:1-2)

Talba: O Alla, li gglorifikajt lill-konfessur tiegħek San Nikola Tavelić billi tajtu li jxerred l-Evanġelju u l-palma tal-martirju, agħtina li b’talbu, ikun jistħoqqilna li nimxu fuq il-passi tiegħu u permezz tal-interċessjoni tiegħu nirċievu l-premju tar-rebbieħa, il-ħajja eterna . Bi Kristu Sidna. Ammen.

English Version: https://www.franciscanmedia.org/saint-of-the-day/saint-nicholas-tavelic-and-companions/

Alternative Reading: https://daily-prayers.org/saints-library/nikola-tavelic-2/ or https://www.roman-catholic-saints.com/saint-nicholas-tavelich.html

Wikipedia: https://en.wikipedia.org/wiki/Nicholas_Tavelic

Nota: It-Tagħrif dwar dan il-qaddis tal-lum huwa meħud mill-fuljett Signum Fidei.